三哥的社會活動

大家有無拎到我地個口罩收納膠套呢? 攞唔到唔緊要，三哥繼續幫大家加加油?? 三哥準備咗紙袋比大家暫存口罩，仲有消毒酒精棉抹下手機同隨身飾物！歡迎三粉們嚟防疫加油站自取物資呀！當然仲有唔少得我地全線分店都有酒精消毒液比大家用喇！

加點心思　送口罩收納膠套！ 口罩保護我哋免受病毒感染，咁邊個幫我哋保護咁珍貴嘅口罩呢？答案就係三哥嘅可重用「口罩收納膠套」嘞！有咗佢，唔駛再擔心口罩畀飲品或湯汁濺濕，真係既環保又衛生！ 而家凡惠顧三哥全線分店堂食，就可以獲贈膠套一個，三哥準備咗10萬個，先到先得，送完即止！

新年將至，三哥喺度先同大家拜個早年！今年我哋依然秉承傳統，年三十晚除3間分店外全線休息一天，畀姐姐可以同家人好好團圓。部份分店會提早年初一啟市，等各位三粉新年都有口福！

正所謂冬大過年，由三哥開業至今，我哋都喺冬至早收，畀勞苦功高嘅一班前線姐姐返屋企做節。今年當然唔會例外，想食三哥，嗰日記得趁早呀！ 冬至(12月22日)三哥全線分店*營業至下午4:00，3:30就截單，敬請留意。 *元朗形點及九龍灣德福廣場分店照常營業

土匪義工團隊出動！我哋邀請咗60位受明愛向晴軒照顧嘅媽咪同小朋友，嚟三哥一齊食午餐。 我哋仲請嚟小丑姐姐米米同小朋友玩遊戲，三哥姐姐仲親手整爆谷比小朋友，小朋友嘅笑聲真係冇停過。 希望大家都可以趁住佳節，將歡樂分享畀身邊嘅每一位啦！

由三哥全力贊助嘅「LIFE MART 原創・獨創・創意手作市集」除咗有一眾文創單位擺攤，仲有一連串三哥主題節目，好似香麻辛辣大激試、絲網印刷活動、霓虹燈打卡位等。

平時為滿足各位三粉，三哥姐姐都緊守崗位盡心工作；嚟到中秋佳節，我哋就秉承傳統早收，畀姐姐同家人共敘天倫，好好休息一日。各位三粉千祈唔好介意呀！ 中秋節(9月13日)三哥全線分店*營業至下午4:00，想嗌土匪加餸，記得喺3:40截單之前落單啦。 *機場、九龍塘又一城、元朗形點及九龍灣德福廣場分店照常營業

譚仔三哥身體力行，今日我哋一班三哥同事一齊去西貢海灘清理垃圾！ 三哥行前一步，希望大家都一齊行多一步，今個summer去沙灘玩完記得帶走垃圾，愛護我哋嘅家園！

由5月30日起，譚仔三哥全線分店將會用紙飲管取代膠飲管，同時歡迎大家外賣時自攜合適的外賣器皿。 三哥主動行前一步，希望大家都可以行多一步，主動走飲管以及外賣餐具。一人行多一步，不要膠下去！